poemes

نداء إلى الشعب الجزائري
شعب الدزايركي راكم غافلين الليل فات واقريب يبان الحال
حل الجهاد واحنايا رنا راقدين نوضوا تحزمو تحزيمت لهوال
النيف للعرب ها من عادت لولين والموت على الوطن ما هيش محال
باغي انعيد ليكم يا جمع الفاهمين شوفو واش داروا هذو لبطال
بدو الثورة ربعة لمعينين هانوا عمارهم للمولى تعال
بوشريط ومعاه ارفاقة فائزين اهل الشحان سابق ما هوش اردال
اشحال من قصائد داروهم باينين هزو فرانسا هزة بالميثال
اشحال من كوانف منهم متكسرين حكام يرعد ومن فرسان اكسال
يوم الصيادة كل ايجو ساعين مكان من يمنع ضربت لغزال لخبار سافرت لقنوس المسلمين من كل برجات اتعاون لبطال
جمال وبورقيبة منهم متهولين راهم عمرو ذا الشرق بلمحال
من المغرب جات الفين مسلحين شاف كما ندار اقراده شعال
دارو العاهدمرو متواصيين كل اقرب دارو منه ختال
بالرديف والمسلسل شبان امحزمين بالطامصات والفانت كات اشحال
من مكانة لسيدي عيسى متبلدين وفي بالسباع ها مركاح الزلزال
الضغط راه رد الناس اللي غالطين مكان من ابقى فينا شين افعال
شرعنا راه ضروك عند المفضلين حاكمنا كتاب الله ومقال
الذل والقيامة راهم متعادلين والاجل في زمام الله لا تبدال
الرزق والفلاحة ذا ساعة صامطين لا بيع لا شرا في وقت اقتال
ربي اتشوف فينا وانت لينا امعين بجاه النبي محمد يا جلال
في جاه جبنا لك الانبياء و الصالحين واسرافيل وجبريل وميكال
في جاه جبنالك لسلاف الطاهرين وابجاه من ادرك واتبدل تبدال
بجاه من ركعو والناس الساجدين وبجاه من احفظ الستين اكمال
بجاه من اقطع البحور الغامقين وامحى الذنوب واصفى من كل اعلال
بجاه من امشاو البرك حاجين قفلوا عامهم في صحرت لرمال
تنصر جيشنا على جيش الكافرين وتحفظ من اهرب النجمة واهلال
ترحم والديا وناس السامعين وترحم من انظم وافهم ذي لقوال
اخيار المساكن عند المجاهدين واللي ايكون لرقبة يسكن لجبال