قصيدة حيزيّة
عزوني يا ملاح في رايس لبنات
سكنت تحت اللحود ناري مڤديا
ياخي أنا ضرير بيا ما بيا
قلبي سافر مع الضامر حيزيه
يا حصراه على قبيل كنا في تاويل
كي نوار العطيل شاو النقصيا
ما شفنا من أدلال كي ظل الخيال
راحت جدي الغزال بالجهد عليا
وإذا تمشي أقبال تسلب العقال
أختي باى المحال راشق كميا
طلقت ممشوط طاح بروايح كى فاح
حاجب فوق اللماح نونين بريا
عينك قرد الرصاص حربى فى قرطاس
سورى قياس فى يدين حربيا
خدك ورد الصباح و قرنفل وضاح
الدم عليه ساح مثل الضوايا
شوف الرقبة خيار من طلعة جمار
جعبة بلار و العواقد ذهبيا
فى بازر حاطين أنصبح فى الزين
واحنا متبسطين فى خير الدنيا
نصبح فى الغزال انصرش للفال
كالى ساعي المال وكنوز قويا
ما يسواش المال نقحات الخلخال
كى انجبي للجبال نلقى حيزيا
تتسحوج فالمروج بخلخيل تسوج
عقلي منها يروج قلبي وأعضيا
فالتل مصيفين جينا أمحدرين
للصحراء قاصدين نا والطوايا
الأجحاف مغلقين و البارود إنين
الأزرق بي يمين ساحة حيزيا
ماذا درنا أعراس لزرق فى المرداس
يدرق بي خلاص في روحنيا
تاقت طول العلام جوهر فالتبسام
تمعني فالكلام و تفهم فيا
بنت حميده اتبان كى ضي الومان
نخلة بستان غى وحدها شعويا
زند عنها الريح قلعها فالميح
ما نحسبها أطيح دايم محضيا
في واد أثل نعيد حاطين سماط فريد
رايسة الغيد ودعتني يا خويا
في ذا الليلة وفات عادت في الممات
كحلا الرمقات ودعت دار الدنيا
خطفت عقلي راح مصبوغة الألماح
بنت الناس الملاح زادتني كيا
حطوها في لكفان بنت عالي الشان
زادتني حمان نفضت مخ حجايا
حطوها في فنعاش مطبوعة الاخراس
راني وليت باص واش إلي بيا
في حومتها أخراب كي نجم الكوكاب
زيد أقدح في أسحاب ضيق العشويا
كثرت عني هموم من صافي الخرطوم
ما عادتش أتقوم في دار الدنيا
ماتت موت الجهاد مصبوغة الاثماد
قصدوا بيها بلاد خالد مسميا
عشَّات تحت الألحاد موشومة الأعضاد
عين الشراد غابت على عينيا
أحفار القبور سايس ريم القور
لا تطيحشي الصخور على حيزيا
قسمت لك بالكتاب وحروف الوهاب
لا طيح التراب فوق أم مرايا
لو تجي للعناد ننطح ثلث اعقاد
نديها بالزناد عن قوم العد يا
واذا نحلف وراس مصبوغة الأنعاس
مانحسب شي الناس لو تجي ميا
لو انتجي للزحام نفتن عنها عام
نديها بالدوام نابو سهميا
كي عاد أمر الحنين رب العالمين
لا صبتلها من أين نقلبها حيا
صبري صبري عليك نصبر أن ناتيك
نتفكر فيك يا أختي غير انتيا
عودي في ذا التلول رعى كل خيول
واذا والى الهول شاو المشليا
ما يعمل ذا الحصان في حرب الميدان
يخرج شاو القران أمه ركبيا
بعد شهر ما يدوم عندي ذا الملجوم
نهار ثلاثين يوم أوراء حيزيا
توفى ذا الجواد ولى فالأوهاد
بعد أختي مازاد يحيا في الدنيا
صدوا صد الوداع هو وأختي قاع
طاح من يدي صراع لزرق آدايا
رب أجعل الحياة وراهم ممات
منهم روحي فنات الأثنين أرزيا
نبكي بكي الفراق كي بكي العشاق
زادت قلبي حراق خوضت مايا
يا عيني واش بيك تنوحي لا تشكيك
زهو الدنيا بديك ما تعفي شي عليا
زادت قلبي عذاب مصبوغة الأهداب
سكنت تحت التراب قرة عينيا
نبكي والراس شاب عن مبروم الناب
فرقة الأحباب ما تصبر عينيا
الشمس إلي ضوات طلعت وأتمسات
سخفت بعد أن ستوات وقت الضحويا
القمر ألي بان شعشع في رمضان
جاه المسيان طلب وداع الدنيا
هذا حكم الإله سيدي مولى الجاه
ربي نزل قضاه وداى حيزيا
صبرني يا اله قلبي مات ابداه
حب الزينه أداه كي صدت هيا
تسوى ميتين عود من الخيل الجيد
ومية فرس زيد غير الركبيا
تسوى من الابيل عشر مايه تمثيل
تسوى غابة النخيل في كل الدنيا
تسوى عرب التلول والصحرا والزمول
ما مشات القفول عن كل أثنيا
تسوى اللي راحلين واللى فالبرين
تسوى اللى حاطين عادوا حضريا
تسوى خيل الشليل و نجمة الليل
في أختي قليل قليل طبي ودوايا
نستغفر للجليل يرحم ذا القليل
يغفر للى يعيل سيدي وملايا
عزوني يا أسلام في ريمة الاريام
سكنت دار الظلام ذيك الباقيا
عزوني يا أصغار في عارم الأوكار
ما خلاَّت غير دار قعدت مسميا
عزوني يا رجال في صافي الخلخال
داروا عنها حيال لسا مبنيا
سعيد في هواك ماعادش يلقاك
كي يتفكر أسماك تديه أغميا
اغفر لي يا حنين أنا والاجمعين
راه أسعيد حزين به الطوايا
أرحم مول الكلام واغفر لأم علام
لاقيهم في المنام يا عالي العليا
يا علام الغيوب صبر ذا المسلوب
نبكي بكي الغريب ونشف العديا
ما ناكلش الطعام سامط في الافوام
واحرم حتى المنام على عنيا
بين موتها والكلام غي ثلاث أيام
بقاتني بالسلام وما ولات ليا
تمت يا سامعين في الألف وميتين
كمَّل تسعين وزيد خمسا باقيا
كلمة ولد الصغير قلناها تفكير
شهر العيد الكبير فيه الغنايا
في خالد بن سنان بن قطون أفلان
قال ع اللي زمان شفناها حيا
قلبي سافر مع ألأضامر حيزيا
تاريخ الإضافة : 13/02/2011
مضاف من طرف : presse-algerie
صاحب المقال : الفجر
المصدر : www.al-fadjr.com