حسوة بسكرية حارة

من الاكلات الشعبية المعروفة في ولاية بسكرة
وهي عبارة عن رقاق (كسرة) و نسقيه بمرقة خاصة بلا ماننساوعصرة الليمون ونزينوها بحبات الزيتون والفلفل المرقد ونختموها برشة الدبشة و الكرافس.
وكيما معروف كاين ثلاثة أنواع حسوة لي هي حسوة الفرينة حسوة الدقيق، والحسوة المربية وكل نوع يتميز بمذاقو الخاص.
ليوم درتلهم حسوة بنينة تهبل هزيت الطريقة من عند عجوزتي 🥰
بالنسبة للطبق الاخير درت فيه شوي مقصوص وبعثتو لراجلي ❤
صح غداكم وشهيتكم فالجنة وربي يخليكم يارب
تعديل: البنات انا هك تعلمت الطريقة من عند خالتي وهي بسكرية صافي كل واحد وطريقتو وكل منطقة وكفاه يسمو هذ الاكلة هي هك يديروها وهك يسموها والله بنينة ماشاء الله سيرتو حارة وفالجو هذا ✌
هاي ليكم الوصفة:
بالنسبة للعجين ديري مسمن عادي وفتتيه رقيق شوي على تاع شخشوخة مهم المسمن هذا مايكونش مزيت و تحطي زوج لوزات فوق بعضاهم وكي طيبيهم افريقهم على بعضاهم وفتتيهم رقاق.
وبالنسبة للمرقة جيبي برمة ديري فيها لفت أو القرعة مع الفول اليابس لي كاين ديريه انا مادرتش الفول والقرعة ماحضرتليش درت لفت برك خليتو فالماء يطيب وحدو بدون اضافات
و في مقلة جيبي طماطم و الثوم تكون رحيتيهم مليح والثوم كمية لباس بيها حطيهم فالمقلة و ديري ملح وراس الحانوت انا تاعي مخلط فيه الكسبر و فلفل لحمر و جيبي الشحمة و الزيت و طماطم تاع لباط وخلطيهم وزيدي كرافصة قطعيها رقيقة و اقليهم خليهم يتكتكو شوي و طفي عليهم
وبعدها جيبي الكوكوطة تاعك ديري فيها الماء للنص مثلا على حساب العائلة وديري 6 مغارف فرينة وجيبي الفوي واقعدي تخلطي حتى تذوب الفرينة كامل واقعدي مين ذاك تخلطي وعندك لاتفيضلك والنار ماتكون قاوية ماتكون ناقصة حتى تشوفي الفرينة طايبة تولي صفرة جيبي لاصوص ضيفيلو دبشة مقطعة رقيقة و اللفت يكون طاب صاي ولوحيهم فالكوكوطة و لوحي فلفل حلو وحار كان تحبي الحار يزيدها فلبنة و زيدي رونديلة تاع قارص ورجعي لغطا برك على الكوكوطة ماتقفليش عليها بيسك راه كلش طاب وحدو و كي تجي تسربي حطي شوي مسمن فلقصعة ولا طبسي تاعك و ديري المرقة وزيدي لوحي مسمن وزيدي مرقي و حطي الخضرة تاعك من فوق كان درتي الفول ولا القرعة ولا لفت و زيدي الدبشة من فوق هذي هي