الفستق_الأطلسي

, #البطمة , #تيجغت أو #الأقغ بالأمازيغية أو pistachier de l’Atlas و الإسم العلمي ديالو Pistacia atlantica , هاذ الشجرة المذهلة 🌳😯 , العجيبة و المقاومة للحرارة و التصحر , أصلها من شمال إفريقيا و تتواجد تقريبا بكامل #الجزائر , لكن بأعداد قليلة بزاف و في حالة يرثى لها.
عندها دور مهم بزاف فالطبيعة و #النظم_البيئية ( ليزيكوسيستام) من حيث أنها مقاومة للرياح, مقاومة للجفاف, تقدر تعيش في أنواع مختلفة من التربة و تثبت الأرض و تمنعها من الإنجراف.
الجذع ديالها مدهش و يقدر الطول ديالها يوصل لعشرين متر و تقدر تعيش لأكثر من ألف (1000) سنة !
بكري كانو يستخرجوا من الجذعها واحد المادة يقولولها #العلك و كانو يمضغوها كي الشوينغوم , و يخدموبيها المرهمات (pommade) اللي يستعملوها كمطهر , مضاد للفطريات, و علاج أمراض البطن.
حجم ثمارها قد حبة الجلبانة , كاين اللي يقولولها " #الخضيري" ( شوفوها في ليكومونتاغ) تجي في ألوان مختلفة و لكن يغلب عليها اللون الأخضر, غنية بزيت كثيف و مغذي. أجدادنا كانو يخلطوها بالتمر و ياكلوها كمادة طبية خصوصا في أوقات السخانة و الصيف ☀🌡.
ذوق #الزيت المستخرج من ثمارها قريب لذوق الزبدة , ومحبوب بزاف عند ناس الجنوب , حيث يقومو بتجفيف الثمار, ثم يدرسوها , و يرحوها و يخلطوها بالتمر و يديرو بيها كريات صغار, يخلوهم ينشفوا ياكلوهم كي الكاوكاو🥜 و يقولو أنهم بزاف بنـــــــان.
يوجد من يقول أن هاذ الشجرة تتواجد أينما يتواجد نبات #السدر إذ أن هناك طائر يأكل ثمرة شجرة البطمة و عندما يحط على غصن من شجرة السدر يلقيها مع فضلاته و بعد مدة تظهر شجيرة #البطمة تحت شجرة السدر ثم تكبر على حساب الشجرة المضيفة حتى تبقى وحدها مكان السدرة.
على الرغم من كامل الفوائد ديال هاذ الشجرة, ليست محل إهتمام السلطات و المواطنين و راهي في طريق #الإنقراض, بسبب القطع الغير مدروس, النمو الديمغرافي والتوسع العمراني والرعي العشوائي واقتلاع فسائل الفستق الأطلسي.
كنتوا تعرفوها من قبل ؟ هل سبق أن غرستوها أو صورتوها؟